ලංකාවට බාල ගල් අගුරු විකුණූ ඉන්දියානුවා! රෙඩ්ඩිගේ මගඩිගේ ඉතිහාසය ගැන විශේෂ හෙළිදරව්ව! මෙය කියවා ඔහුව හෝදනවාදැයි දෙපාරක් හිතන්න!

ශ්‍රී ලංකාවේ ජාතික පද්ධතියට වැඩිම විදුලි ධාරිතාවක් සපයන නොරොච්චෝල ලක්විජය බලාගාරය සඳහා 2025/2026 වර්ෂයට අවශ්‍ය ගල් අඟුරු මෙට්‍රික් ටොන් මිලියන 1.5ක් සැපයීමේ කොන්ත්‍රාත්තුව ඉන්දියාවේ Trident Chemphar Limited සමාගම වෙත ප්‍රදානය කළේය.

කෙසේ වෙතත්, මෙම තේරීම පිටුපස ඇති විධිවිධාන උල්ලංඝනය කිරීම් විගණකාධිපති වාර්තාවෙන් හෙළි විය. එලෙස හෙළිව තිබියදීත් මේ ගැන කෝප් කමිටු විමර්ශනයේදී මෙන්ම පාර්ලිමේන්තු විවාදයේදීත් විපක්ෂය දැක්වූ පුදුමාකාර දුර්වලතාව නිසා දැන් ආණ්ඩුව කියමින් ඉන්නේ කිසිදු ප්‍රශ්නයක් ගනුදෙනුවේදී සිදු වී නැති බවයි.

විශේෂයෙන්ම විගණකාධිපති වාර්තාව මගින් අනාවරණය කළ බරපතල කරුණු සම්බන්ධයෙන් නිදහසට කරුණු කීමට ආණ්ඩු පාර්ශ්වය අවස්ථාව සලසා දුන් හැටි කෝප් කමිටුවේදී දක්නට ලැබුණි. එයට විපක්ෂයේත් නොමද සහාය හිමි විය. ගල් අඟුරු සමාගමේ නිලධාරීන්ට විගණකාධිපති වාර්තාවෙන් හෙළි වූ කරුණු සාධාරණීකරණය කිරීමට ඉඩ ලබා දුන්නේ විමසන්නට ඇති නිශ්චිත ප්‍රශ්න අසන්නේ නැතිවය. ඒ හරහා විගණන වාර්තාවෙන් හෙළි කළ වංචනික ස්වභාවය සැර බාල කොට පෙන්වීමටත්, එම ගනුදෙනුවල කිසිදු දෝෂයක් නොමැති බව ඒත්තු ගැන්වීමටත් අවශ්‍ය පසුබිම ආණ්ඩුව විසින් සකස් කරන ලදි.

එහෙත් එලෙස ආණ්ඩුව ආරක්ෂා කරමින් සිටින්නේ ජාතික ජන බලවේගය පමණක් නොවේ. ලංකාවට ගල් අගුරු ගෙන්වූ සමාගමටත් එයින් ආරක්ෂාවක් ලැබේ.

ලංකා ගල් අඟුරු සමාගම විසින් සිදුකළ මෙම ප්‍රසම්පාදන ක්‍රියාවලිය ප්‍රසම්පාදන මූලධර්මයක් වන ‘සාධාරණත්වය’ෙ උල්ලංඝනය කර ඇත. 2025 අගෝස්තු 18 දින ලංසු කැඳවන විටත් Trident Chemphar Limited සමාගම නියමිත ඇමෙරිකානු ඩොලර් 5,000ක ලියාපදිංචි ගාස්තුව ගෙවා නොතිබුණි. එසේ තිබියදීත්, ම සමාගම “ලියාපදිංචි සැපයුම්කරුවෙකු” ලෙස සලකා එදිනම ඔවුන් වෙත විද්‍යුත් තැපෑලෙන් ලංසු ලේඛන යැවීමට බලධාරීන් කටයුතු කර ඇත. අඩු තරමේ ඔවුන් ගාස්තුව ගෙවනතුරුවත් එම ලංසු ලේඛන ලැබීමට ඉවසා නොතිබුණි.

මෙම සැපයුම්කරු සිය ලියාපදිංචි ගාස්තු ගෙවා ලියාපදිංචිය සම්පූර්ණ කර ඇත්තේ 2025 අගෝස්තු 22 දිනයි. එනම්, ලංසු කැඳවා දින හතරකට පසුවය. ලියාපදිංචි නොවූ සැපයුම්කරුවෙකුට මෙවැනි වරප්‍රසාදයක් ලබා දීම අනෙකුත් විභව සැපයුම්කරුවන්ට සිදුකළ බරපතල අසාධාරණයකි. දැන් එය සාධාරණීකරණය කිරීමට කෝප් කමිටුවේදී කීවේ අගෝස්තු 13 වන විට අමාත්‍ය මණ්ඩල අනුකමිටුවෙන් උපදෙස් දී තිබුණු ලියාපදිංචි කිරීමට තීන්දු කර ඇති නමුත් ලියාපදිංචිය අවසන් නොකළ සමාගම්වලට ලංසු ලේඛන යැවූ බවයි. ඒත් ඒ කමිටුවේ ඉන්නේත් ආණ්ඩුවමය.

ඕනෑම රාජ්‍ය මට්ටමේ ගිවිසුමක් අත්සන් කිරීමට පෙර නීතිපතිවරයාගේ එකඟතාව ලබාගත යුතුය. Trident Chemphar සමග ගිවිසුමට නීතිපති එකඟතාව ලැබී ඇත්තේ 2025 නොවැම්බර් 20 වැනිදාය. එහෙත්, පුදුමයට කරුණ නම් ඊට පෙර දින, එනම් 2025 නොවැම්බර් 19 වැනිදාම ලංකා ගල් අඟුරු සමාගම මෙම විදේශීය සමාගම සමග ගිවිසුම්ගත වී තිබීමයි. එයටත් නිදහසට කරුණු ඇත.

මේ ආකාරයෙන් නිදහසට කරුණු කියමින් මේ සමාගම ලංකාවට ගල් අගුරු ලබා දීමට එකග වුණා පමණක් නොවේ. දකුණු අප්‍රිකාවෙන් නැවට ගල්අගුරු පැටවීමේදී මෙන්ම ගල්අගුරු බාන විට ඉන්දියාවෙන් මේ ගල් අගුරුවල ප්‍රමිතිය තහවුරු කොට සහතික ලබාගත් ආකාරය පිළිබද දැන් ඇත්තේ බරපතල ගැටලුවකි. කෝප් කමිටුවේදීද හෙළි වූ පරිදි ඒ සහතික ලබාගැනීමේ ක්‍රියාවලියත් බරපතල ලෙස ගැටලු සහගතය.

ඒ නිසා අපට බාල ගල් අගුරු ගෙන්වූ ඉන්දියානු සමාගමේ ඉතිහාසය අපි ගවේෂණය කළෙමු.

රාම්ප්‍රසාද් රෙඩ්ඩි පවුල

තෙළුගු භාෂාව කතා කරන, ආන්ද්‍රා ප්‍රදේශ්හි ජිවත් වන, හයිද්‍රාබාද් නිවහන කරගත් රෙඩ්ඩි නාමය සහිත ව්‍යාපාරික පවුල් ඇත්තේ එකක් නොවේ. රෙඩ්ඩි මුසල්මානුවන්ට මොහොමඩ් වාගේ ආන්ද්‍රාවේ සහ තෙලංගානාවේ රෙඩ්ඩි යනු සුලභ නාමයකි.

ව්‍යාපාරික රෙඩ්ඩිලා අතර Aurobindo Pharma හි සම-නිර්මාතෘ පී.වී. රාම්ප්‍රසාද් රෙඩ්ඩි මේ වන විට ඇමෙරිකානු ඩොලර් බිලියන 3.3ක ශුද්ධ වත්කමකට හිමිකම් කියන්නෙකි. ඔහු ලොව 1279 වැනි ධනවතාය. ඔහුගේ සමාගම් ජාලය රටවල් 150කට අධික සංඛ්‍යාවක ව්‍යාප්ත වී ඇති අතර, 2025 ජූලි මාසයේදී ඇමෙරිකානු ඩොලර් මිලියන 250ක ගනුදෙනුවක් මගින් Lannett සමාගම අත්පත් කරගන්නා ලදී. මේ රෙඩ්ඩිලාගේ ව්‍යාපාරික ජාලයේ ප්‍රබල බල කණුවකි Trident Chemphar සමාගම. එහි වැඩි අයිතිය ඇත්තේ රාම්ප්‍රසාද් රෙඩ්ඩිගේ පුතා වූ සරත් චන්ද්‍ර රෙඩ්ඩිටය. අපට බාල ගල්අගුරු එව්වේ ඔවුන්ය.

සරත් චන්ද්‍රා රෙඩ්ඩි ට්‍රයිඩන්ට් කෙම්ෆාර් ලිමිටඩ් (Trident Chemphar Ltd.) හි කළමනාකාර අධ්‍යක්ෂවරයෙකි. ඔහු ඊට අමතරව පහත සඳහන් සමාගම්වල අධ්‍යක්ෂ මණ්ඩල සාමාජිකයෙකු ලෙස කටයුතු කරයි:

• අරොබින්දෝ ෆාමා ලිමිටඩ් (Aurobindo Pharma Ltd.)
• ඇපිටෝරියා ෆාමා පෞද්ගලික ලිමිටඩ් (Apitoria Pharma Pvt Ltd.)
• ඒපීඑල් හෙල්ත්කෙයාර් ලිමිටඩ් (APL Healthcare Ltd.)
• ඒපීඑල් රිසර්ච් සෙන්ටර් ලිමිටඩ් (APL Research Centre Ltd.)
• ඕරෝ කියෝර් පෞද්ගලික ලිමිටඩ් (Auro Cure Pvt Ltd.)
• ඕරෝ පෙප්ටයිඩ්ස් ලිමිටඩ් (Auro Peptides Ltd.)
• අරොබින්දෝ ෆාමා පදනම (Aurobindo Pharma Foundation)
• ඕරෝනෙක්ස්ට් ෆාමා පෞද්ගලික ලිමිටඩ් (Auronext Pharma Pvt Ltd.)
• ඕරීන් ලැබ්ස් ලිමිටඩ් (Auryn Labs Ltd.)
• කියුරටෙක් බයොලොජික්ස් පෞද්ගලික ලිමිටඩ් (Curateq Biologics Pvt Ltd.)
• කියුරප්‍රෝ පේරන්ටරල්ස් ලිමිටඩ් (Curepro Parenterals Ltd.)
• පීවීආර් හෝල්ඩින්ග්ස් පෞද්ගලික ලිමිටඩ් (Pvr Holdings Pvt Ltd.)
• ශ්‍රියාස් ඉන්ඩස්ට්‍රීස් ලිමිටඩ් (Shreas Industries Ltd.)
• ටර්ජීන් බයෝටෙක් පෞද්ගලික ලිමිටඩ් (Tergene Biotech Pvt Ltd.)

ට්‍රයිඩන්ට් සමාගමේ පසුබිම පැහැදිලි කිරීමේදී ඉන්දීය සුරැකුම්පත් හා විනිමය කොමිසම විසින් ලබා දුන් MC/VS/2019-20/4550-4556 අංකය දරණ නියෝගය ගැන අපි ඉදිරියේදී කීමට බලාපොරොත්තු වෙමු. ඔවුන්ට ඇති මුල්ම චෝදනාවකි, එය. එහෙත්, ආරම්භය ගත යුත්තේ වඩාත් ආන්දෝලනාත්මක චෝදනාවෙනි.

දිල්ලි මධ්‍යසාර නඩුව

Trident Chemphar Limited සහ එහි සරත් චන්ද්‍ර රෙඩ්ඩි (Sarath Chandra Reddy) ඉන්දියාවේ පසුගිය කාලයේ මහත් ආන්දෝලනයකට තුඩු දුන් “දිල්ලි මධ්‍යසාර ප්‍රතිපත්ති වංචාව” ගැන මුලින් කතා කරන්නේ ඒ නිසාය. ඉන්දියාවේ මධ්‍යම විමර්ශන කාර්යාංශය හෙවත් සීබීඅයි මේ පිළිබද ගොනු කර තිබුණු නඩුවෙන් චූදිතයන් වූ ආම් ආද්මි පක්ෂයේ නායකයන් ඇතුළු පිරිස නිදහස් විය. එහෙත් ඉන්දියාවෙ මූල්‍ය අපරාධ පිළිබද විමර්ශනය කරන The Directorate of Enforcement (ED) විමර්ශනයේදී ඔහුට රජයේ සාක්ෂිකරුවෙකු වීමට යෝජනා විය. සීබීඅයි නඩුව මේ වෙද්දී තීන්දුව පිළිබද අභියාචනය කරන මට්ටමේ පවතී.

දිල්ලි මධ්‍යසාර නඩුව වැදගත් වන්නේ දිල්ලි හිටපු මහ ඇමති අරවින්ද් කේරිජ්වාල් නිසාය. මේ නඩුව පසුපස දේශපාලන වුවමනාවක් තිබුණු බව ඇත්තකි. නඩුවෙන් ආම් ආද්මි පක්ෂය විනාශ කිරීමට බීජේපීයට අවශ්‍ය විය. එහෙත් ඇත්තටම බීජේපීයේ වුවමනා ඉටු කෙරුණේ නඩුවට ඉදිරිපත්ව ඇති කරුනු නිසාය.

අරවින්ද් කෙජ්රිවාල් (Arvind Kejriwal) ‘හයිද්‍රාබාද් මුල් කරගත් දකුණු ඉන්දියානු ව්‍යාපාරිකයන් කණ්ඩායමක්’ (South Group) සමඟ ඍජුවම සාකච්ඡා කර ඇති බවත්, මධ්‍යසාර ප්‍රතිපත්තිය ඔවුන්ට පක්ෂපාතී වන පරිදි සංශෝධනය කර දීම සඳහා රුපියල් කෝටි 100 ක අල්ලස් මුදලක් (kickbacks) ලබා දෙන ලෙස ඉල්ලා ඇති බවත් විමර්ශනවලදී අනාවරණය වී ඇතැයි හෙළි විය.

ඔහුට අමතරව ආම් ආද්මි පක්ෂයේ හිටපු නියෝජ්‍ය මහ ඇමති මනීෂ් සිසෝඩියා (Manish Sisodia) ද මෙම මූල්‍ය කුමන්ත්‍රණයේ සහ දූෂිත මූල්‍ය ක්‍රියාවලියේ ප්‍රධානියෙකු ලෙස හඳුනාගෙන ඇත. ඊට අමතරව තවත් ප්‍රබල පුද්ගලයන් ගණනාවකට චෝදනා වී තිබුණි.

මෙහි වැදගත්කම වන්නේ, දිල්ලි ප්‍රදේශයේ මත්පැන් බලපත්‍ර අලෙවි කිරීමේදී ව්‍යාපාරිකයන් පිරිසකට අයුතු ලාභයක් ලැබීමට හැකි ආකාරයට මධ්‍යසාර ප්‍රතිපත්තිය වෙනස් කළ බවට වන චෝදනාවයි. ඒ චෝදනාව එල්ල වන්නේ දූෂන විරෝධයෙන් බලයට පත් වූ පොදු ජනතාවගේයැයි කියාගත් ආණ්ඩුවකටය. ප්‍රශ්නය වන්නේ අදටත් මේ චෝදනාව අපරාධයක් ලෙස එප්පු කිරීමට බැරි වුණත් ඉදිරිපත්ව ඇති කරුණු අනුව දැනටමත් මේ ව්‍යාපාරිකයන්ට අයුතු ලාභයක් ලැබී ඇතැයි ඔප්පු වූ නිසාය.

මෙම දේශපාලන නායකයන් සහ දකුණු ඉන්දියානු මධ්‍යසාර ව්‍යාපාරිකයන් අතර ප්‍රධාන මැදිහත්කරු ලෙස කටයුතු කර ඇත්තේ විජේ නායර් (Vijay Nair) නැමැත්තායි. ඔවුන් වංචාවෙන් උපයාගත් සමස්ත මුදලින් රුපියල් කෝටි 45 ක මුදලක් ආම් ආද්මි පක්ෂයේ ගෝවා මැතිවරණ ව්‍යාපාරය සඳහා යොදාගෙන ඇති බවයි. සරත් චන්ද්‍ර රෙඩ්ඩි යනු මෙම නඩුවේදී ප්‍රදේශ පහක මත්පැන් අලෙවි කිරීමට ට්‍රයිඩන්ට් චෙම්ෆර් ඇතුළු සමාගම් කිහිපයක් නියෝජනය කරමින් ලයිසන් ලබාගෙන සම්බන්ධ වූවෙකි. ඔහු මේ සිදුවීමේදී අල්ලස් ලබාදුන් බවටත් චෝදනා එල්ල විය.

සීබීඅයි නඩුවේ තීන්දුව මෙහි ඇත. පිටු හයසීක පමණ තීන්දුව කියැවීම වැදගත් වන්නේ අපරාධමය චෝදනාවක් ඔප්පු කරන්නට අසමත් වුණත්, මෙහි 23 වන සැකකරුවා වන සරත් චන්ද්‍ර රෙඩ්ඩි ඇතුළු ව්‍යාපාරිකයන් ක්‍රියා කර ඇති ආකාරයයි. ආම් ආද්මි පක්ෂය වැනි දූෂණ විරෝධී රජයක් හමුවේ අයුතු ලාභ ගැනීමට ඔවුන්ට හැකිව ඇති ආකාරය නඩුවේ පැහැදිලිව පෙනෙන්නට ඇත.

මේ සිදුවීමට සරත් චන්ද්‍ර රෙඩ්ඩි සම්බන්ධ වී ඇත්තේ කේ. කවිතාගේ මැදිහත්වීමෙන් බව නඩු විමර්ශනවලදී හෙළි වී තිබේ. කවිතා යනු තෙලංගානා මහ ඇමතිගේ දියණියයි. ඇයත් දේශපාලනයේ ක්‍රියාකාරී කතකි. ඇය මේ සිදුවීමේදී දකුණු ඉන්දීය ව්‍යාපාරිකයන් සමගග ගනුදෙනු කර ඇත. 2021 ජූලි 20 දින පැවති දිල්ලියේ මධ්‍යසාර අලෙවි කිරීම සදහා වූ සිල්ලර වෙළඳ කලාප ලංසු තැබීමේදී, සරත් චන්ද්‍ර රෙඩ්ඩිට සම්බන්ධ සමාගම් කලාප පහක (five zones) ජයග්‍රහණය ලබා ගැනීමට සමත් වී ඇත. වෙන්දේසියෙන් මේවා ලබා ගැනීම වෙනුවෙන් කේ. කවිතා වෙත රුපියල් කෝටි 14 ක මුදලක් ගෙවීමට මොහු කටයුතු කර ඇතැයි චෝදනා එල්ල විය.

මෙම මූල්‍ය ගනුදෙනු සිදු කර ඇත්තේ ඉතා සූක්ෂ්ම ලෙස ‘ව්‍යාජ ඉඩම් ගනුදෙනුවක්’ (sham land deal) මුවාවෙන් බව වැඩිදුරටත් විස්තර කර තිබේ. ඒ අනුව, 2021 ජූලි මාසයේදී රුපියල් කෝටි 7 ක් සහ 2021 නොවැම්බර් මාසයේදී තවත් රුපියල් කෝටි 7 ක් බැංකු ගනුදෙනු හරහා කේ. කවිතා වෙත ලබා දී ඇති නමුත්, එවැනි ගනුදෙනුවකට අදාළව කිසිදු ඉඩමක් හුවමාරු වී නොමැති බව විමර්ශනවලදී තහවුරු වී ඇත. මීට අමතරව, 2021 මාර්තු මාසයේදී අරොබින්දෝ සමූහයේ සමාජ වගකීම් (CSR) අරමුදල්වලින් රුපියල් ලක්ෂ 80 ක මුදලක් කේ. කවිතා විසින් මෙහෙයවනු ලබන ‘Telangana Jagruthi’ නම් රාජ්‍ය නොවන සංවිධානය වෙත ලබා දී ඇත්තේ ද ඇයගේ ව්‍යාපාරික සහයෝගය වෙනුවෙන් බව නඩු වාර්තාවල මෙසේ සදහන්ව ඇත.

එමෙන්ම, මෙම ගනුදෙනු වෙනුවෙන් පිහිටවූ ‘M/s Indo Spirits’ නම් තොග වෙළඳ සමාගමටද සරත් චන්ද්‍ර රෙඩ්ඩි සහ අරොබින්දෝ සමූහය සක්‍රීයව දායක වී තිබේ. 2021 සැප්තැම්බර් 20 දින ‘M/s Pernod Ricard India Pvt. Ltd’ සමාගම විසින් ‘Indo Spirits’ ආයතනය තොග වෙළෙන්දෙකු ලෙස පත් කිරීමට අදාළව පැවැත්වූ රැස්වීමට සරත් චන්ද්‍ර රෙඩ්ඩි සහභාගී වී ඇති බව ඔහුගේ ජංගම දුරකථනයෙන් ලබාගත් ඡායාරූප සාක්ෂි මගින් තහවුරු වී තිබේ. රෙඩ්ඩිගේ පුතා හරහා මේ සමාගමට ඔහු සම්බන්ධ වී තිබේ.

මෙම සමස්ත ක්‍රියාවලිය හරහා මධ්‍යසාර තොග වෙළෙඳුන්ගේ ලාභාංශය 5% සිට 12% දක්වා වැඩි කර ගැනීමෙන් රුපියල් කෝටි 193 ක අධික ලාභයක් මාස 10 ක් ඇතුළත උපයාගෙන ඇති බවත්, එය මෙම අපරාධයෙන් උපයාගත් දූෂිත මුදල් (proceeds of crime) ලෙසත් විමර්ශන ආයතන විසින් හඳුන්වා දී ඇත. අරුන් පිල්ලෙයි සහ තවත් නියෝජිතයන් හරහා සරත් චන්ද්‍ර රෙඩ්ඩි මෙම සමස්ත මූල්‍ය කුමන්ත්‍රණයේ ප්‍රධානියෙකු ලෙස කටයුතු කර ඇති බව විමර්ශන වාර්තාවල මෙසේ සදහන්ව ඇත.

තවම ඔහුට මෙයට අදාලව දඩුවම් ලැබෙනවාද නැද්ද යන්න හෙළිදරව් වී නැත. මන්ද සරත් චන්ද්‍ර රෙඩ්ඩි යනු මෝදි හිතවාදියෙකි. ඔහු මේ සිදුවීමට සම්බන්ධ එක් නඩුවක රජයේ සාක්ෂිකරුවෙකු වුණේත් ඒ නිසා බව පෙන්වන්නට කරුණු ඉදිරියේදී ඉදිරිපත් කරන්නෙමු.

කාකිනාඩ වරාය

Trident Chemphar සහ Aurobindo සමූහයට එරෙහිව ඇති තවත් බරපතලම චෝදනාවක් වන්නේ FIR No: 30/2024 යටතේ වාර්තා වී ඇති “කාකිනාඩ වරාය” බලහත්කාරයෙන් අත්පත් කරගැනීමේ සිද්ධියයි. මෙයි ඔබට එයට අදාල චෝදනා පත්‍රය මෙතැනින් කියැවිය හැක.

මේ සිද්ධියට අදාල පැමිණිලිකාර කර්ණාටි වෙන්කටේෂ්වර රාඕ (KVR) පවසන පරිදි, එවකට ආන්ධ්‍රා ප්‍රදේශ් මහ ඇමති ජගන් මෝහන් රෙඩ්ඩිගේ මැදිහත්වීමෙන්, ව්‍යාජ විගණන වාර්තා පෙන්වා, සිරගත කරන බවට තර්ජනය කර ඔහුගේ කොටස් ඉතා අඩු මිලකට (Pittance price) අත්පත් කරගැනීමට සරත් චන්ද්‍ර රෙඩ්ඩි සහ Aurobindo Realty කටයුතු කර ඇත.

රුපියල් කෝටි 2500කට අධික වටිනාකමකින් යුත් කොටස් රුපියල් කෝටි 494කට ලබාගෙන ඇති අතර, KSEZ සමාගමේ කොටස් රුපියල් කෝටි 1109ක් වෙනුවට රුපියල් කෝටි 12කට පමණක් ලබාගෙන ඇති බවට චෝදනා එල්ල වී තිබේ. මෙවැනි “වංචනික ලෙස වත්කම් කොල්ලකෑමේ” චෝදනා සහිත සමාගමක් ලංකාවේ ප්‍රධාන බලශක්ති සැපයුම්කරුවෙකු ලෙස තෝරාගැනීම විශාල අවදානමකි.

වෙන්කටේෂ්වරා රාඕ මහතාට අනුව, 2019 වසරේදී ජගන් මෝහන් රෙඩ්ඩි මහ ඇමති ධුරයට පත්වීමෙන් පසු ලාභ ලබන ව්‍යාපාර අත්පත් කර ගැනීම සඳහා ක්‍රමානුකූල කුමන්ත්‍රණයක් ක්‍රියාත්මක විය. මෙම කුමන්ත්‍රණයට අරොබින්දෝ ෆාමා හි සරත් චන්ද්‍රා රෙඩ්ඩි, පාර්ලිමේන්තු මන්ත්‍රී වී. විජයසායි රෙඩ්ඩි (V. Vijayasai Reddy) සහ වයි. වික්‍රාන්ත් රෙඩ්ඩි (Y. Vikranth Reddy) යන අය සෘජුවම සම්බන්ධ වී ඇති බවට FIR වාර්තාවේ සඳහන් වේ.

රජයට ගෙවිය යුතු ආදායම් කොටස රුපියල් කෝටි 1000ක් පමණ අවභාවිත කර ඇති බව පෙන්වීම සඳහා ව්‍යාජ විශේෂ විගණනයක් (Special Audit) සහ වෝහාරික විගණනයක් (Forensic Audit) සිදු කර ඇත. මෙම ව්‍යාජ විගණන වාර්තා පදනම් කරගෙන වෙන්කටේෂ්වරා රාඕ සහ ඔහුගේ පවුලේ සාමාජිකයින් අත්අඩංගුවට ගන්නා බවට තර්ජනය කර සමාගමේ කොටස් විකිණීමට බල කර තිබේ.

ඒ අනුව 2020 මැයි මාසයේදී විජයසායි රෙඩ්ඩි මන්ත්‍රීවරයාගේ මැදිහත්වීමෙන් වික්‍රාන්ත් රෙඩ්ඩි සහ සරත් චන්ද්‍රා රෙඩ්ඩි යන අය වෙන්කටේෂ්වරා රාඕ හමු වී ඇත. එහිදී ඔවුන් පවසා ඇත්තේ රජයෙන් එල්ල වන රුපියල් කෝටි 1000ක දඩයෙන් බේරීමට නම් සමාගමේ කොටස් අරොබින්දෝ රියල්ටි (Aurobindo Realty) වෙත පැවරිය යුතු බවයි.

එයින් පසු රුපියල් කෝටි 2500කට වඩා වටිනා KSPL හි කොටස් 41.12%ක් රුපියල් කෝටි 494කටත්, රුපියල් කෝටි 1109ක් වටිනා KSEZ හි කොටස් 48.74%ක් රුපියල් කෝටි 12ක් වැනි ඉතා සුළු මුදලකටත් බලහත්කාරයෙන් අත්පත් කර ගෙන තිබේ.

අත්පත් කර ගැනීමෙන් පසු අරොබින්දෝ සමාගම විසින් KSPL වෙතින් රුපියල් කෝටි 102ක ලාභාංශ ලබාගෙන ඇති අතර, රුපියල් කෝටි 280ක අන්තර් සමාගම් තැන්පතු (ICDs) තමන්ගේම ව්‍යාපාර සඳහා ලබාගෙන ඇත.

ඒ අනුව කලින් කී දිල්ලි මධ්‍යසාර නඩුව ඉන්දියාවේ එක් ප්‍රාන්තයක ආණ්ඩුවට සම්බන්ධ එකක් වෙද්දී, මේ කාකිනාඩ වරායේ නඩුව ඉන්දියාවේ වෙනත් ප්‍රාන්තයක ආණ්ඩුවක් හා එක්ව කළ වංචාවකි. එහෙත් මේ ඉන්දියාවේ නඩුවලින් හෙළි වෙන්නේ ලංකාවට බාල ගල් අගුරු විකුණු සමාගමේ පැටිකිරියයි.

සුරැකුම්පත් තීන්දුව

ඉන්දියානු සුරැකුම්පත් හා විනිමය මණ්ඩලය (SEBI) විසින් අරොබින්දෝ ෆාමා ලිමිටඩ් (Aurobindo Pharma Ltd – APL) සමාගමේ කොටස් ගනුදෙනු සම්බන්ධයෙන් පවත්වන ලද පරීක්ෂණයකින් ලැබුණු තීන්දුවක්ද අපි මේ ගවේෂණයේදී සොයා ගත්තෙමු. අපි මුලින්ම සදහන් කළේ ඒ ගැනය.

මෙහිදී ප්‍රධාන වශයෙන්ම අභ්‍යන්තර තොරතුරු මත වෙළඳාම් කිරීම (Insider Trading) පිළිබඳ චෝදනා එල්ල වී ඇත. සරත් චන්ද්‍ර රෙඩ්ඩිලා ලංකාවට බාල ගල් අගුරු සපයමින් සිදු කළ වංචාව ගැන සෙවීමේදී මේ අභ්‍යන්තර තොරතුරු හුවමාරු කිරීමට ඇති පුරුද්දත් දැනගැනීම වැදගත්ය.

2008 ජූලි 22 සිට 2009 මාර්තු 20 දක්වා කාලසීමාවේදී අරොබින්දෝ ෆාමා සමාගම සහ ලොව ප්‍රමුඛ පෙළේ ඖෂධ සමාගමක් වන Pfizer Inc. අතර ඇති කරගත් බලපත්‍ර සහ සැපයුම් ගිවිසුම් කිහිපයකි. මෙම ගිවිසුම් 2008 ජූලි සිට දෙසැම්බර් දක්වා කාලය තුළ අත්සන් කර තිබුණද, ඒවා පොදු මහජනයාට ප්‍රකාශයට පත් කළේ 2009 මාර්තු 3 වනදාය. ඉතින් ඔය කාලසීමාව ඇතුළත මෙම තොරතුරු ප්‍රසිද්ධ වීමට පෙර සමාගමට සම්බන්ධ පාර්ශවයන් විසින් අරොබින්දෝ ෆාමා සමාගමේ කොටස් විශාල වශයෙන් මිලදී ගෙන ලාභ ලබා තිබේ.

එයට අදාලව ඉන්දීය සුරැකුම්පත් හා විනිමය මණ්ඩලය විසින් සිදුකළ අධිකරණමය විමර්ශනයකදී දඩ මුදල් නියම කරන ලදී. එහි තීන්දුව පහත දැක්වේ.

මෙම නඩුවේ 4 වන වගඋත්තරකරු (Noticee No. 4) ලෙස නම් කර ඇත්තේ ට්‍රයිඩන්ට් කෙම්ෆාර් ලිමිටඩ් සමාගමයි.

එම තීන්දුවට අනුව මෙම සමාගම අරොබින්දෝ ෆාමා සමාගමේ ප්‍රවර්ධක කණ්ඩායමට (Promoter Group) අයත් වන්නකි. එහි කොටස්වලින් 99.98% ක් හිමිව තිබුණේ අරොබින්දෝ ෆාමා හි සභාපති පී.වී. රාම්ප්‍රසාද් රෙඩ්ඩි මහතාගේ පුත්‍රයා වන පී. සරත් චන්ද්‍ර රෙඩ්ඩිටය. එනම් ලංකාවට ගල් අගුරු ගෙන්වූ අප කලින් කී චෝදනා රැසකට මුහුණදුන් තැනැත්තාය.

තමන්ගේ තාත්තාගේ සමාගම ගැන රහසිගත තොරතුරු දැනගෙන පුතාගේ ට්‍රයිඩන්ට් කෙම්ෆාර් ලිමිටඩ් විසින් අරොබින්දෝ ෆාමා සමාගමේ කොටස් 636,000 ක් මිලදී ගෙන ඇත. 2008 දෙසැම්බර් 03, 04, 05, 08 සහ 10 යන දිනවලදී මෙම මිලදී ගැනීම් සිදු කර ඇත. ඔවුන් මෙම කොටස් මිලදී ගෙන ඇත්තේ සාමාන්‍යයෙන් කොටසක් රුපියල් 113.88 බැගිනි. එයින් පසු කොටස් මිල සීඝ්‍රෙයන් ඉහළ ගියේය. ඉහළ මිලට කොටස් විකුණා ඇත.

පරීක්ෂණය අවසානයේ අදාළ පාර්ශවයන්ට පහත පරිදි දඩ නියම කරන ලදී:

මැතිවරණ බැදුම්කර

ඊළගට අප කතා කරන්නේ මේ වංචාවල තවත් ස්වභාවයක් ගැනය. එය ලංකාවේ අද පවතින සැක සහිත තත්වයට වඩාත් වැදගත් කොටසය.

රෙඩ්ඩි තනි පුද්ගලයන්ට අමතරව දේශපාලන පක්ෂවල මැතිවරණ ව්‍යාපාර වෙනුවෙන් වියදම් කරන්නට සිදුවෙන අධික වියදම් ලබා දීම ගැන චෝදනා එල්ල වූවෙක් වීම ඒ වැදගත් කාරණයයි. ආම් ආද්මි පක්ෂයට පමණක් නොව, බීජේපීයටත් ඒ ආකාරයෙන් මැතිවරණවලට වියදම් කිරීම ගැන රෙඩ්ඩිට චෝදනා එල්ලවෙයි.

සරත් රෙඩ්ඩිව දිල්ලි මධ්‍යසාර නඩුවට අදාලව 2022 දී අත්අඩංගුවට ගැනීමෙන් දින පහකට පසු, එනම් 2022 ජුලි මාසයේදී ඔහුගේ සමාගම රුපියල් කෝටි 5ක මැතිවරණ බැඳුම්කර භාරතීය ජනතා පක්ෂයට (BJP) ලබා දී ඇති බව හෙළි විය. අරබින්දෝ ආයතනය රුපියල් කෝටි 52ක බැඳුම්කර භාරතීය ජනතා පක්ෂය වෙනුවෙන් මිලදී ගෙන ඇත. ඒ අතරින් කෝටි 25ක් ඔහු දිල්ලි මධ්‍යසාර නඩුවේ සාක්ෂිකරුවෙකු වූ පසු ලබා දුන් බවත් හෙළි විය.

මැතිවරණ බැඳුම්කර යනු දේශපාලන පක්ෂ සඳහා මූල්‍ය පරිත්‍යාග සිදු කිරීම සඳහා ඉන්දියාවේ ක්‍රිියාත්මක වන ක්‍රමයකි. මෙම ක්‍රමය යටතේ පුද්ගලයන්ට හෝ සමාගම්වලට මෙම බැඳුම්කර මිලදී ගෙන ඒවා තමන් කැමති දේශපාලන පක්ෂයකට ලබා දිය හැකිය.

පසුව එම දේශපාලන පක්ෂවලට එම බැඳුම්කර මුදල් කර ගැනීමට (encash) හැකියාව ලැබේ. මෙම ක්‍රමයේ ඇති ප්‍රධාන ලක්ෂණයක් වන්නේ බැඳුම්කරය මිලදී ගත් පුද්ගලයා සහ එය ලබාගත් දේශපාලන පක්ෂය අතර සෘජු සම්බන්ධය හෙළි නොවන පරිදි රහස්‍යභාවය පවත්වා ගැනීමට උත්සාහ කිරීමයි. එහෙත් එම සම්බන්ධතාවය හඳුනා ගැනීමට අවශ්‍ය “අනන්‍ය හඳුනාගැනීමේ අංක” තිබෙන අතර, මහා පරිමාණ ව්‍යාපාරිකයන් විවිධ දේශපාලන පක්ෂවල බැදුම්කර මිලදී ගෙන ඇති ආකාරය පසුකාලීනව හෙළිදරව් විය.

විශේෂයෙන් ප්‍රමුඛ පෙළේ සමාගම් රාශියක් රජයේ මධ්‍යම විමර්ශන ආයතනවල පරීක්ෂණවලට හෝ වැටලීම්වලට ලක් වූ පසුව මෙම බැඳුම්කර මිලදී ගෙන තිබුණි. ‘Project Electoral Bond’ විමර්ශනයට අනුව සමාගම් 21ක් මෙලෙස විමර්ශනවලට මුහුණ දීමෙන් පසු බැඳුම්කර මිලදී ගෙන ඇති බව හෙළි වී ඇත. මෙහිදී තවත් වැදගත් යමක් කිව යුතුය, ලංකාවට ගල් අගුරු විකුණන්නට ආ ආදිත්‍ය බිර්ලා නම් සමාගමත් කෝටි සීයක බැදුම්කර මිලදී ගෙන ඇතැයි එහිදී හෙළි විය.

බලාත්මක කිරීමේ අධ්‍යක්ෂ මණ්ඩලය (ED), ආදායම් බදු දෙපාර්තමේන්තුව (IT), මධ්‍යම විමර්ශන කාර්යාංශය (CBI) සහ GST බලධාරීන් විසින් වැටලීම් සිදු කළ සමාගම් මෙලෙස බැඳුම්කර මිලදී ගෙන ඇත. ඇතැම් සමාගම් තමන්ට එරෙහිව පරීක්ෂණ ආරම්භ වී හෝ වත්කම් තහනම් කර තිබූ කාලසීමාවන් තුළදීම විශාල වශයෙන් බැඳුම්කර මිලදී ගෙන තිබේ.

මෙම වැටලීම් සහ බැඳුම්කර මිලදී ගැනීම් අතර ඇති කාල පරාසය සහ සම්බන්ධතාවය හේතුවෙන්, මෙය දේශපාලන රැකවරණය ලබා ගැනීමට හෝ නීතිමය ක්‍රියාවලීන්ගෙන් මිදීමට සිදු කරන ලද ගනුදෙනු බවට සමාජය තුළ ප්‍රබල සැකයක් මතු වී ඇත.

ඒ අනුව දේශපාලන පක්ෂවලට මැතිවරණ වෙනුවෙන් සල්ලි ලබාදෙන, අභ්‍යන්තර තොරතුරු හුවමාරු කරමින් විවිධ ව්‍යාපාර කටයැුතුවල යෙදෙන කණ්ඩායමක් ලංකාවට බාල ගල් අගුරු විකිණීම අහම්බයක්ද? කිසිම වංචාවක් සිදු වී නැතිද? මුළු ජාතික ජන බලවේගයම අද වක්‍රාකාරව මේ සමාගමේ අහිංසකභාවය වෙනුවෙන් පෙනී ඉන්නේ ඇයි?