ජපානයේ ටෝකියෝහිදී පැවැත්වෙන ලෝක මලල ක්රීඩා ශූරතාවලියේ හෙල්ල විසිකිරීමේ පිරිමි ඉසව්වේ අවසන් තරගයට සුදුසුකම් ලබා ගැනීමට ශ්රී ලංකාවේ රුමේෂ් තරංග සමත් විය.
ඊයේ පැවති මේ ඉසව්වේ සුදුසුකම් ලැබීමේ වටයේදී ‘බී’ කාණ්ඩයෙන් තරග කළ රුමේෂ් මීටර් 82.80ක දක්ෂතාවක් සමඟින් අවසන් තරගයට වරම් හිමිකර ගත්තේය. එම තරගයට එක්වූ ක්රීඩකයන් 18 දෙනා අතරින් ඔහු දැක්වූ දක්ෂතාව 6 වැනි තැනට පත්ව තිබිණි.
අවසන් තරග වරම් ලැබූ ක්රීඩකයන් 12 දෙනා අතරින් රුමේෂ් 12 වැනියා ලෙස සිටි අතර, මීටර් 86.50ක හොඳම පෞද්ගලික දක්ෂතාව සමඟින් ශ්රී ලංකා වාර්තාවට හිමිකම් කියන ඔහු ලෝක ශ්රේණිගත කිරීම්වල 12 වැනි ස්ථානයේ පසු වෙයි. රුමේෂ් එක් වන මේ ඉසව්වේ අවසන් මහ තරගය අද (18) මෙරට වේලාවෙන් පස්වරු 3.35ට ආරම්භ වීමට නියමිතය.
මේ අතර එම ඉසව්වේදී ශ්රී ලංකාව නියෝජනය කරමින් ‘ඒ’ කාණ්ඩයෙන් තරග කළ සුමේධ රණසිංහට අවසන් තරගයට එක් වීමේ අවස්ථාව අහිමි වී ගියේය. ඔහු සුදුසුකම් ලැබීමේ වටයේදී මීටර් 81.86 දක්ෂතාවක් දැක්වූ අතර, එම කාණ්ඩයේ ක්රීඩකයන් 19 දෙනා අතරින් ඔහුට හිමි වූයේ 8 වැනි ස්ථානයයි. සමස්ත ක්රීඩකයන් 37ක් එක් වූ මේ ඉසව්වේදී සුමේධ වාර්තා කළ දුර අනුව 15 වැනි ස්ථානයට පත්ව තිබිණි. මීටර් 85.78ක හොඳම දක්ෂතාවක් පෙන්වා ඇති සුමේධ ලෝක ශ්රේණිගත කිරීම්වල 30 වැනි ස්ථානයේ පසු වෙයි.
මේ ශූරතාවලියට ශ්රී ලංකාව නියෝජනය කරමින් නදීශා රාමනායක ද එක්වූ අතර, ඇයට මීටර් 400 මූලික වටයෙන්ම ඉවත් වීමට සිදු විය.
