(අකිලා නදීෂානි බණ්ඩාර)
හිටපු රාජ්‍ය ඇමැතිනි ඩයනා ගමගේ වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ මහාධිකරණය ඉකුත් (22දා) නිකුත් කළ වරෙන්තුව ආපසු කැඳවන ලෙස කොළඹ මහාධිකරණ විනිසුරු නදී අපර්නා සුවඳුරුගොඩ මහත්මිය නියෝග කරයි.
විත්තිකාර ඩයනා ගමගේ නීතිඥ මොහාන් සෙනෙවිරත්න මහතා මගින් මෝසමක් ඉදිරිපත් කර අධිකරණයට භාර විමෙන් අනතුරුව මෙලෙස වරෙන්තුව ආපසු කැඳවීමට මහාධිකරණ විනිසුරුවරිය නියෝග කලාය.
එහිදී විත්තිකාරිය වෙනුවෙන් සිටි නීතිඥවරයා සඳහන් කරේ විත්තිකාරියට අත්‍යවශ්‍ය ගමනක් යෙදීම හේතුවෙන් අධිකරණයට පැමිණීමට ප්‍රමාද වූ බවයි. එකී හදිසි කරුණ නිසාවෙන් අධිකරණයේ නියමිත වේලාවට පෙනී සිටීමට නොහැකි වූ බවද නීතිඥවරයා සඳහන් කළේය.
එහිදී විනිසුරුවරිය සඳහන් කර සිටියේ විත්ති කූඩුවට නැගි පසු තරාතිරම කුමක් වුවත් සියලුම දෙනා එක හා සමානව සලකන බවත් නීතියද සියලුම දෙනාට එක හා සමාන වන බවත්ය. එමෙන්ම නඩු ගොනුව පරීක්‍ෂා කරන විටදී තමන්ට පෙනී යන්නේ මින් පෙරද විත්තිකාරිය මේආකාරයෙන් අවස්ථා කිහිපයකදී අධිකරණයට ප්‍රමාද වී පැමිණි. ඒ සම්බන්ධයෙන් මහාධිකරණ විනිසුරුවරිය විත්තිකාරියට තරයේ ආවාද කරනු ලැබුවේ මින් ඉදිරියට නිසි වේලාවට අධිකරණය හමුවේ පෙනී සිටින ලෙසයි.
ඉන් අනතුරුව ඇයව අත්අඩංගුවට ගැනීමට නිකුත් කර තිබූ වරෙන්තුව ආපසු කැඳවන ලෙස නියෝග කර මහාධිකරණ විනිසුරුවරිය නඩුව හෙට (28) පස්වරු 1.30ට යළි කැඳවන ලෙසද නියෝග කළාය.
පසුගිය 22 ඩයනා ගමගේ අධිකරණය හමුවේ පෙනී නොසිටි අවස්ථාවේදී ඇයගේ ඇපකරුවන්ටද නොතේසි නිකුත් කරනු ලැබීය. එහිදී ඈය වෙනුවෙන් ඇපකරුවෙකු ලෙස පෙනී සිටින චමින්ද ජයලත් නැමැත්තාද නීතිඥ අසිත විපුලනායක මහතා මගින් අධිකරණය හමුවේ පෙනී සිටියේය.
ව්‍යාජ උප්පැන්නයක් ඉදිරිපත් කර හැඳුනුම්පතක් ලබා ගැනීමේ චෝදනාවට විත්තිකාරියට එරෙහිව පවරා ඇති නඩුව විභාගයට ගත් අවස්ථාවේ අධිකරණය ඉදිරියේ පෙනී නොසිටි හිටපු රාජ්‍ය ඇමැතිවරියට එලෙස වරෙන්තු නියම කෙරිණි.
පෙර අවස්ථාවකදී ද නඩු දිනය අමතකවූ බව පවසා අධිකරණයට ඉදිරිපත්වීම පැහැර හැරි විත්තිකාරිය වහාම අත්අඩංගුවට ගන්නා ලෙස කොළඹ මහාධිකරණ විනිසුරු නදී අපර්ණා සුවන්දුරුගොඩ මහත්මිය නියෝග කර තිබිණි.
විත්තිකාරියට එරෙහිව පවරා ඇති නඩුවේ සාක්ෂි විභාගය අවසන්ව ලේඛන නිවැරැදි කිරීමෙන් පසු දේශන සඳහා දින නියම කිරීමට ඉකුත් (22දා) නඩුව කැඳවන ලදි.
ශ්‍රී ලංකාවේ පුරවැසියකු නොවන බව දැන දැනම, සිය නම ‘ඩයනා ගමගේ’ යනුවෙන් නීත්‍යනුකූලව සංශෝධනය කර නොමැතිව එම නම සඳහන් හැඳුනුම්පතක් ලබා ගැනීම සඳහා පුද්ගලයන් ලියාපදිංචි කිරීමේ දෙපාර්තමේන්තුවේ නිලධාරීන් රැවටීමේ අදහසින් අංක 4658 දරන කූට උප්පැන්න ලේඛනයක් පානදුරේදී හෝ කොළඹදී සකස් කිරීම සහ ඊට අනුබල දීම යන චෝදනා යටතේ මෙම නඩු පවරා ඇත.
2004 ඔක්තෝබර් 9 වැනිදා සහ දෙසැම්බර් 1 වැනිදා අතර කාලය තුළදී ව්‍යාජ උප්පැන්නයක් ඉදිරිපත්කර ව්‍යාජ හැඳුනුම්පතක් සකස් කර විදේශ ගමන් බලපත්‍ර ලබා ගැනීමේ චෝදනාව යටතේ ඩයනා සමන්මලී හෙවත් ඩයනා නටාෂා කැකුණදුර හෙවත් ඩයනා ගමගේ නමැත්තියට එරෙහිව මෙම නඩුව පවරා තිබේ.
නීතිපතිවරයා විසින් දණ්ඩ නීති සංග්‍රහයේ 32, 102, 457 සහ 459 යන වගන්ති යටතේ අධිචෝදනා 3ක් ඉදිරිපත් කරමින් 2024 ජූනි 6 වැනිදා චෝදනා ගොනුකර ඇත. රජයේ අධිනීතිඥ අකිලා දල්පදාදු මහත්මිය පැමිණිල්ල වෙනුවෙන් පෙනී සිටියාය.
