‘සිරිලිය සවිය’ සම්බන්ධයෙන් පොලිස් මූල්‍ය අපරාධ විමර්ශන කොට්ඨාශය සිදුකරන විමර්ශනයක් අතරතුර විදේශගතව සිටින හිටපු ජනාධිපති මහින්ද රාජපක්ෂ මහතාගේ බිරිඳ ශිරන්ති රාජපක්ෂ මහත්මිය මාලිගාකන්ද මහේස්ත්‍රාත් අධිකරණයෙන් අපේක්ෂිත ඇප ඉල්ලා තිබේ.
ශිරන්ති රාජපක්ෂ මහත්මිය වෙනුවෙන් අද (05) ඉදිරිපත් කළ එම අපේක්ෂිත ඇප අයදුම්පත මාලිගාකන්ද මහේස්ත්‍රාත් ජනනි පෙරේරා මහත්මිය ඉදිරියේ කැඳවා තිබේ.
ඇය විදේශගතව සිට නැවත ශ්‍රී ලංකාවට පැමිණෙන අවස්ථාවේ ගුවන් තොටුපළේදී පොලිසිය විසින් අත්අඩංගුවට ගැනීමේ හැකියාවක් පවතින බව සඳහන් කරමින්, එවැනි අත්අඩංගුවට ගැනීමක් සිදුවුවහොත් ඕනෑම සුදුසු ඇප කොන්දේසියක් යටතේ තමන් මුදාහරින ලෙස ඇය අධිකරණයෙන් ඉල්ලා ඇත.
නීතිඥ ජයබාලන් මහතා මාර්ගයෙන් ඉදිරිපත් කර ඇති මෙම අයදුම්පතේ පෙත්සම්කාරිය ලෙස මේරි ලූඩ්ස් ශිරන්ති රාජපක්ෂ නම් කර ඇති අතර, වගඋත්තරකරු ලෙස අපරාධ පරීක්ෂණ දෙපාර්තමේන්තුවේ අධ්‍යක්ෂවරයා නම් කර තිබේ.
අපට වාර්තා වන පරිදි, මෙම අපේක්ෂිත ඇප අයදුම්පත සම්බන්ධයෙන් පොලිස් මූල්‍ය අපරාධ විමර්ශන කොට්ඨාශයටද දැනුම්දී ඇති අතර, ඒ අනුව ඇය සම්බන්ධයෙන් සිදුකරන විමර්ශනයේ තත්ත්වය හා අපේක්ෂිත ඇප ඉල්ලීම සම්බන්ධයෙන් විමර්ශන නිලධාරීන්ගේ ස්ථාවරය අධිකරණයට ඉදිරිපත් කිරීමට අවස්ථාව සැලසේ.
ශිරන්ති රාජපක්ෂ මහත්මිය සැප්තැම්බර් 16 වැනිදා අලුයම සිංගප්පූරුව බලා ශ්‍රී ලංකාවෙන් පිටත්ව ගොස් තිබුණි.
ඇය විදේශගතවූයේ වෛද්‍ය ප්‍රතිකාර ලබාගැනීම සඳහා බව ඇයගේ පාර්ශ්වය ප්‍රකාශ කර තිබේ.
ඇය ගුවන් තොටුපළේ සිටියදී සිරිලිය සවිය විමර්ශනයට අදාළව සැප්තැම්බර් 24 වැනිදා පොලිස් මූල්‍ය අපරාධ විමර්ශන කොට්ඨාශය හමුවේ පෙනී සිටින ලෙස දැනුම්දීමක්ද භාරදී තිබුණි.
එම දැනුම්දීම අපරාධ නඩු විධාන සංග්‍රහයේ 109(6) වගන්තිය යටතේ ලබාදී තිබිණි.
ශිරන්ති රාජපක්ෂ පාර්ශ්වය සඳහන් කර තිබුණේ ඇය ගුවන් තොටුපළට පැමිණීමට පෙර එවැනි දැනුම්දීමක් ලබාදී නොතිබූ බවත්, පිටත්වීමට සූදානම්ව සිටියදී එය ලැබුණු බවත්ය.
කෙසේ වෙතත්, සැප්තැම්බර් 24 වැනිදා ඇය FCID හමුවේ පෙනී සිටියේ නැත.
ඇය වෙනුවෙන් නීතිඥවරයකු මූල්‍ය අපරාධ විමර්ශන කොට්ඨාශයට ලිඛිතව දැනුම්දී තිබුණේ, ඇය විදේශගතව වෛද්‍ය ප්‍රතිකාර ලබමින් සිටින බැවින් එදින පෙනී සිටීමට නොහැකි බවත්, නැවත ශ්‍රී ලංකාවට පැමිණීමෙන් පසුව FCID හමුවේ පෙනී සිටීමට සූදානම් බවත්ය.
ඉන් අනතුරුව ඇයගේ නීතිඥයන් විසින් ඇය නැවත පැමිණ විමර්ශකයන් හමුවේ පෙනී සිටීම සඳහා ආසන්න වශයෙන් තවත් සති දෙකක කාලයක් ඉල්ලා තිබූ අතර, ඊළඟ පියවර ගැනීමට පෙර එම කාලය ලබාදීමට FCID තීරණය කර ඇති බවද වාර්තා විය.
මේ අතර එලෙස ලබාදුන් දීර්ඝ කළ කාලසීමාව තුළද ශිරන්ති රාජපක්ෂ මහත්මිය FCID හමුවේ පෙනී නොසිටියහොත් ඇයට එරෙහිව විදේශ ගමන් තහනමක් ඉල්ලා අධිකරණයට කරුණු වාර්තා කිරීම සහ ඇය දිවයිනට පැමිණීමේදී අත්අඩංගුවට ගැනීමේ හැකියාව සම්බන්ධයෙන් නීතිපතිවරයා විසින් උපදෙස් ලබා දී තිබුණි.
ඒ පසුබිම තුළ, ශ්‍රී ලංකාවට නැවත පැමිණීමේදී තමන් අත්අඩංගුවට ගනු ඇතැයි ඇති සැකය පදනම් කරගෙන ශිරන්ති රාජපක්ෂ මහත්මිය අද මාලිගාකන්ද මහේස්ත්‍රාත් අධිකරණයෙන් අපේක්ෂිත ඇප ඉල්ලා තිබීම විශේෂත්වයකි.
