ව්යාජ උප්පැන්නයක් ඉදිරිපත් කර හැඳුනුම්පතක් ලබා ගැනීමේ සිද්ධියක් සම්බන්ධයෙන් හිටපු රාජ්ය ඇමැති ඩයනා ගමගේට එරෙහිව පවරා ඇති නඩුව කොළඹ මහාධිකරණයේ දී ඊයේ (28) විභාගයට ගනු ලැබුවා.
කොළඹ මහාධිකරණ විනිසුරු නදී අපර්ණා ඉදිරියේ කැඳවන ලද මෙම නඩුවේ දී විත්තිකාර ඩයනා ගමගේ දිවුරුම්පිට සාක්කි දෙමින් පවසා සිටියේ, තම නම සහිතව රෙජිස්ට්රාර් ජනරාල්වරයාට ඉදිරිපත්ව ඇති නම් වෙනස් කිරීමේ අයදුම්පත්රයේ දැක්වෙන අත්අකුරු හෝ අත්සන තමාගේ නොවන බවත්, අයදුම්පත ඉදිරිපත් කළ දිනයේ දී තමා විදේශගතව සිටි බවත් ය.
එමෙන්ම ඇය වැඩිදුරටත් එහි දී සඳහන් කරනු ලැබුවේ, තමන් අවස්ථා දෙකකදී නම් වෙනස් කළ බවත්, තමාගේ මුල් නම ඩයනා සමන්මලී වූ අතර පසුව 2013 දී ‘ඩයනා නටාෂා කැකණදුර’ ලෙස ද පසුව නැවත එය ‘ඩයනා ගමගේ’ ලෙස ද වෙනස් කළ බවයි.
කෙසේ නමුත්, ‘ගමගේ’ යනු තමන්ගේ පියාගේ වාසගම බවත්, නම් වෙනස් කිරීමේ අයදුම් පත්රය සමඟ සාක්ෂියක් ලෙස බදු කුලී ගිවිසුමක පිටපතක් ඉදිරිපත් කළ බව මතක නමුත් එය අධිකරණයට ඉදිරිපත් කර ඇති ලේඛනය නොවන බවත් විත්තිකාරිය එහි දී අධිකරණය හමුවේ කරුණු දක්වමින් සඳහන් කරනු ලැබුවා.
තමා නම් වෙනස් කිරීමේ අයදුම් පත්රය ඉදිරිපත් කර මේ වන විට වසර 12ක් ගතව ඇතත් රෙජිස්ට්රාර් ජනරාල්වරයා එම සංශෝධනය කර නැති බවයි විත්තිකාරිය අධිකරණය හමුවේ සඳහන් කරනු ලැබුවේ.
තව ද උසාවියට ඉදිරිපත් කර ඇති ලේඛනයේ තමාගේ ලිපිනය ලෙස නුගේගොඩ, ස්ටේෂන් පාරේ ලිපිනයක් දක්වා ඇතත් තමා එහි පදිංචි නොමැති බව ද සඳහන් කළ විත්තිකාර ඩයනා ගමගේ, තමා පදිංචිව සිටින්නේ අම්ගම්පිටිය පාර, ඇතුල්කෝට්ටේ, කෝට්ටේ යන ලිපිනයෙහි බව ද සඳහන් කරනු ලැබුවා.
මෙලෙස විත්තිකාරියගේ සාක්ෂි විමසීම අවසන් වීමෙන් අනතුරුව, අමතර සාක්ෂිකරුවන් ඉදිරිපත් කරන්නේදැයි අධිකරණය විමසා සිටි අතර විත්තිය විසින් සඳහන් කර සිටියේ එවැනි සාක්ෂිකරුවන් ඉදිරිපත් කිරීමට කටයුතු කරන බවයි.
කෙසේ නමුත්, එහි දී රජයේ අධිනීතිඥ අකිලා දල්පදාදු පෙන්වා දෙනු ලැබුවේ, 2026 වසරේ පෙබරවාරි 3 දා දින සිට සති දෙකක් තුළ විත්තියේ සාක්ෂිකරුවන්ගේ ලේඛනයක් ඉදිරිපත් කරන ලෙස දන්වා ඇති නමුත්, එලෙස ඉදිරිපත් කිරීමක් විත්තිය පාර්ශවයෙන් සිදු වී නොමැති බවයි.
නමුත්, විත්තියට කරුණු දැක්වීමට අවස්ථාවක් දිය යුතු බව තීරණය කළ අධිකරණය සතියක් තුළ විත්තියේ සාක්ෂිකරුවන්ගේ ලේඛනයක් අධිකරණයට ඉදිරිපත් කරන ලෙසයි අනතුරුව නියෝග කරනු ලැබුවේ.
විත්තිකාරියගේ නම ‘ඩයනා ගමගේ’ යනුවෙන් නීත්යනුකූල ලෙස සංශෝධනය නොකළ අවධියක, ශ්රී ලංකාවේ පුරවැසියකු නොවන බව දැනදැනම එම නම සඳහන් හැඳුනුම්පතක් ලබා ගැනීම සඳහා පුද්ගලයන් ලියාපදිංචි කිරීමේ දෙපාර්තමේන්තුවේ නිලධාරීන් රැවටීමේ අදහසින් අංක 4658 දරන කූට උප්පැන්න ලේඛනයක් පානදුරේදී හෝ කොළඹදී සකස් කිරීම, ඒ සඳහා අනුබල දීම යන වරදවල් සඳහා මෙම නඩු පැවරීම සිදුව තිබෙනවා.
