වෙඩි වැදීමෙන් තුවාල ලබා සති ගණනාවක් ප්‍රතිකාර ලබමින් සිටියදී පසුගිය ඔක්තෝබර් 16 වැනිදා ජීවිතක්ෂයට පත් වූ ශ්‍රී ලංකාවේ ප්‍රකට වන හස්තියෙකු වන කාවන්තිස්ස ඇතාට වෙඩි තැබූ බවට සැකකෙරෙන පුද්ගලයෙකු පොලීසිය විසින් අත්අඩංගුවට ගෙන තිබෙනවා.
වාලාන දූෂණ මර්දන ඒකකය සහ වනජීවී සංරක්ෂණ දෙපාර්තමේන්තුව එක්ව ගල්ගමුව ප්‍රදේශයේදී ක්‍රියාත්මක කළ ඒකාබද්ධ මෙහෙයුමකදී මෙම සැකකරු අත්අඩංගුවට ගත් බව පොලීසිය සඳහන් කළා.
එම වැටලීමේදී ගිනි අවි දෙකක්ද සිය භාරයට ගත් බව පොලිසිය පවසනවා.
කාවන්තිස්ස, සිය දකුණු ඉදිරිපස පාදයට එල්ල වූ වෙඩි ප්‍රහාරය හේතුවෙන් හටගත් බරපතළ සෞඛ්‍ය සංකූලතා සමඟ සටන් කරමින් සිටියදී මෙලෙස මියගියා.
සැප්තැම්බර් 24 වන දින සිට කාවන්තිස්සගේ ජීවිතය බේරාගැනීම වෙනුවෙන් පශු වෛද්‍ය කණ්ඩායම් කිහිපයක්ම අඛණ්ඩව ප්‍රතිකාර ලබාදීමේ මෙහෙයුම්වල නිරතව සිටියා..
හස්තියාගේ මරණයත් සමඟ දැඩි මහජන කම්පනයක් සහ නොසන්සුන්තාවයන් හටගනු ලැබුවා.
මේ අතර මෙම වෙඩි තැබීම සහ හස්තියාගේ මරණයට හේතු වූ පසුබිම පිළිබඳව ස්වාධීන පරීක්ෂණයක් පවත්වන ලෙස පරිසරවේදීන් සහ වනජීවී සංරක්ෂණ සංවිධාන විසින්ද බලධාරීන්ගෙන් ඉල්ලා තිබුණා.
කෙසේවෙතත් පොලිසිය පවසන්නේ කාවන්තිස්ස හස්තියාට වෙඩි තැබීම සම්බන්ධයෙන් සිදුකෙරෙන විමර්ශනවල කැපීපෙනෙන ප්‍රගතියක් මෙම අත්අඩංගුවට ගැනීම හරහා සනිටුහන් වන බවයි.
වෙඩි තැබීම සිදුවූ ආකාරය පිළිබඳව තහවුරු කරගැනීමට මෙන්ම සොයාගත් ගිනි අවි මෙම අපරාධය සඳහා යොදාගෙන තිබේද යන්න නිශ්චය කරගැනීම සඳහා වැඩිදුර විමර්ශන මේ වන විටත් ක්‍රියාත්මක වන බව පොලිසිය වැඩිදුරටත් සඳහන් කළා.
