තවත් ගල්අගුරු නැව් දෙකක් ප්‍රමිතිය ෆේල් වෙද්දී කුලතුංග කොමිසම ලබන සතියේ වැඩ පටන්ගනී! සියලු කටයුතු සූදානම්!

මතභේදාත්මක ගල් අඟුරු සැපයුම්කරුවෙකු වන ට්‍රයිඩන්ට් චෙම්පර් (Trident Chemphar) සමාගමෙන් ගෙන්වූ තවත් නැව් වාර දෙකක් තත්ත්ව පරීක්ෂණවලින් අසමත් වී ඇති අතර, ඒ අනුව ස්වාධීන පිළිගත් රසායනාගාරයක් වන කොටෙක්නා (Cotecna) විසින් නියමිත ප්‍රමිතියෙන් තොර බව තහවුරු කරන ලද මුළු නැව් වාර ගණන පහක් දක්වා ඉහළ ගොස් ඇති බව නිල ආරංචි මාර්ග උපුටා දක්වමින් සන්ඩේ ටයිම්ස් පුවත්පත වාර්තා කර තිබේ.

ට්‍රයිඩන්ට් සමාගමෙන් ඇණවුම් කරන ලද මුළු නැව් වාර සංඛ්‍යාව 25 කි. මේ වන විට 16 වන නැව් වාරය ගොඩබෑමේ කටයුතු සිදු කෙරෙමින් පවතින අතර, වෙනත් හදිසි මිලදී ගැනීමක් යටතේ ඇණවුම් කරන ලද ගල් අඟුරු නැව් ද දිවයිනට පැමිණෙමින් තිබේ.

දකුණු අප්‍රිකාවෙන් ගෙන්වන ලද ගල් අඟුරු නැව් වාර තුනක් කොටෙක්නා රසායනාගාරයේ තත්ත්ව පරීක්ෂණවලින් මූලිකවම අසමත් වී ඇති බවත්, ඒ හේතුවෙන් ට්‍රයිඩන්ට් සමාගමට ඇමෙරිකානු ඩොලර් මිලියන 8.1 ක සමස්ත දඩ මුදලක් පනවා ඇති බවත් ‘සන්ඩේ ටයිම්ස්’ පුවත්පත පසුගිය මාසයේ වාර්තා කළේය. කෙසේ වෙතත්, නියමිත ප්‍රමිතියෙන් තොර ගල් අඟුරු අලෙවි කිරීම හෝ සැපයුම් දිගින් දිගටම ප්‍රමාද කිරීම යන කරුණු මත ට්‍රයිඩන්ට් සමාගමේ ගිවිසුම මෙතෙක් අහෝසි කර නොමැත.

එම ආරංචි මාර්ගවලට අනුව, 12, 13 සහ 14 යන නැව් වාරවල දළ තාපජ අගය (Gross Calorific Value – GCV) 4,800 ට වඩා අඩු අගයක් ගෙන ඇති අතර, ඒ සඳහා අවශ්‍ය වන නියමිත ප්‍රමිතිය 5,900 ත් 6,150 ත් අතර අගයක පැවතිය යුතුය. දළ තාපජ අගය (GCV) යනු ගල් අඟුරු ඒකක බරක් සම්පූර්ණයෙන්ම දහනය කිරීමේදී නිකුත් වන තාප ප්‍රමාණයයි. ඉහළ තාපජ අගයක් පැවතීමෙන් අදහස් වන්නේ විදුලි ඒකකයක් නිපදවීම සඳහා අවශ්‍ය වන ගල් අඟුරු ප්‍රමාණය අඩු බවයි.

නොරොච්චෝලේ ගොඩබෑමේ වරායේදී ලබා ගන්නා ගල් අඟුරු සාම්පල පරීක්ෂා කිරීම සඳහා ලක්විජය බලාගාරය විසින් තෝරා ගන්නා ලද ස්වාධීන පිළිගත් රසායනාගාරය වන්නේ කොටෙක්නා (Cotecna) ආයතනයයි. ටෙන්ඩර් ලේඛනයේ සඳහන් කර ඇති තත්ත්ව පරාමිතීන් සමඟ 1, 9, 12, 13 සහ 14 යන නැව් වාරවල ගල් අඟුරු නොසැසඳෙන බව එම රසායනාගාරය මගින් සොයාගෙන ඇත.

මේ අතර ගල් අඟුරු ප්‍රසම්පාදන මිලදී ගැනීම්වලදී කිසියම් අක්‍රමිකතාවක් හෝ නීතිවිරෝධී ක්‍රියාවක් සිදුවී ඇත්ද යන්න පිළිබඳව විමර්ශනය කිරීම සඳහා පත් කරන ලද විශේෂ ජනාධිපති පරීක්ෂණ කොමිෂන් සභාව, ලබන සතියේ සිට එම විමර්ශනයට අදාළ තොරතුරු ලබා දෙන ලෙස මහජනතාවට ආරාධනා කිරීමට සැලසුම් කර ඇත.

කොමිෂන් සභාව හෙට (27) අලුත්කඩේ MCC ගොඩනැගිල්ලේ (අධිකරණ පියස) පිහිටි සිය නව කාර්යාලය වෙත පදිංචියට යාමට නියමිතය. කොමිෂන් සභාවේ විමර්ශන කටයුතු සඳහා සහාය වීමට අවශ්‍ය පොලිස් කණ්ඩායමක් ස්ථාපනය කිරීම සඳහා නිලධාරීන් පත් කරන ලෙස ඉල්ලා ඔවුන් දැනටමත් පොලිස්පතිවරයා වෙත ලිඛිතව දැනුම් දී ඇත.

කොමිෂන් සභාවේ පරීක්ෂණ සඳහා සහාය වීමට සිය දෙපාර්තමේන්තුව තුළ නිලධාරීන් කිහිප දෙනෙකු පත් කරන ලෙස නීතිපතිවරයාගෙන් ද ඉල්ලීමක් කර තිබේ. ජනාධිපති ලේකම් කාර්යාලය විසින් කොමිෂන් සභාව සඳහා ලිපිකරු සහ අනෙකුත් කාර්යාල සේවකයින් දැනටමත් පත් කර ඇති අතර, අවශ්‍ය ගෘහ භාණ්ඩ හා අනෙකුත් උපකරණ ද ලබා දී ඇත.

මූලික කටයුතු අවසන් කිරීමෙන් පසු ලබන සතියේදී සිය විමර්ශන කටයුතු ආරම්භ කිරීමට බලාපොරොත්තු වන බව කොමිෂන් සභාවේ ලේකම් පී. වී. බන්දුලසේන මහතා ඊයේ ‘සන්ඩේ ටයිම්ස්’ පුවත්පතට පවසා තිබේ.

අප්‍රේල් 17 වැනිදා පත් කරන ලද මෙම කොමිෂන් සභාවට, මාස හයක් ඇතුළත සිය විමර්ශනය අවසන් කර වාර්තාව ජනාධිපතිවරයා වෙත ඉදිරිපත් කරන ලෙස පැවරී ඇත.

මෙම කොමිෂන් සභාව ශ්‍රේෂ්ඨාධිකරණ විනිසුරු ගිහාන් කුලතුංග (සභාපති), අභියාචනාධිකරණ විනිසුරු ආදිත්‍ය පටබැඳිගේ සහ මහාධිකරණ විනිසුරු සංජීව සෝමරත්න යන මහත්වරුන්ගෙන් සමන්විත වේ.

(මෙම ප්‍රවෘත්තිය සමග ඇති ඡායාරූපය විනිසුරු කුලතුංග මහතා ජනාධිපතිවරයාගෙන් ශ්‍රේෂ්ඨාධිකරණ විනිසුරුවරයෙකු ලෙස පත්වීම් ලද අවස්ථාවේ එකකි.)