යාපනයේදී පොලීසිය විසින් වෙඩි තබා ඝාතනය කළ 17 හැවිරිදි දෙමළ තරුණයා පිළිබද විමර්ශන අපරාධ පරීක්ෂණ දෙපාර්තමේන්තුව (CID) වෙත පවරන ලෙස අධිකරණ නියෝගයක් කර තිබේ.
ඒ, වින්දිත පවුල වෙනුවෙන් පෙනී සිටි නීතිඥයින් දැනට ක්රියාත්මක පොලිස් පරීක්ෂණයේ අපක්ෂපාතීත්වය පිළිබඳව බරපතල සැක මතු කිරීමෙන් අනතුරුවය.
17 හැවිරිදි අරුල්පියස් නමැති තරුණයා ඝාතනය කිරීම සම්බන්ධ අපරාධ නඩුව පසුගියදා කයිට්ස් (Kayts) මහේස්ත්රාත් අධිකරණය හමුවේ කැඳවනු ලැබීය.
මෙම නඩු වාරය සඳහා ජ්යෙෂ්ඨ පොලිස් අධිකාරීවරයෙකු ඇතුළු පොලිස් නිලධාරීන් 15කට වැඩි පිරිසක් ශ්රී ලංකා පොලිසිය වෙනුවෙන් පෙනී සිටියහ. වින්දිත පවුල වෙනුවෙන් නීතිඥ කුමාරවඩිවේල් ගුරුපරන්, අරුල් නිරෝස් සහ ශාලිනී ඇතුළු නීතිඥයින් හය දෙනෙකු පෙනී සිටින ලදී.
පසුගිය මාසයේ යාපනය අලයිපිඩ්ඩි ප්රදේශයේදී කයිට්ස් පොලිස් ස්ථානයට අනුයුක්ත නිලධාරීන් විසින් එල්ල කරන ලද වෙඩි තැබීමකින් අරුල්පියස් ඝාතනයට ලක් විය. පොලිසිය පවසා සිටියේ වාහනයක් නතර කිරීමට කළ නියෝගය නොතකා ධාවනය කිරීම නිසා මෙම මනුෂ්ය ඝාතනය සිදුකළ බවයි. කෙසේ වෙතත්, මෙම වෙඩි තැබීමෙන් නව යොවුන් වියේ පසුවූ රියදුරු මියයාමත් සමඟ ප්රදේශයේ විරෝධතා සහ වගවීම ඉල්ලා හඬක් මතු විය.
විනාශ වූ ජීවිතය වෙනුවෙන් පෙනී සිටි නීතිඥයින්, පොලිසිය විසින් පවත්වනු ලබන විමර්ශන කෙරෙහි තමන්ට විශ්වාසයක් නොමැති බව තර්ක කළහ:
මරණයට හේතු වූ උණ්ඩය මෙතෙක් සොයාගෙන නොමැති බව ඔවුහු පෙන්වා දුන්හ.
වෙඩි උණ්ඩය වාහනයේ ඉදිරිපස වීදුරුව හරහා ගියේ නම්, එහි පැහැදිලි සලකුණු තිබිය යුතු වුවත් එවැනි සාක්ෂි හඳුනාගෙන නොමැති බව ප්රකාශ විය.
සිද්ධියෙන් පසු වාහනය නවතා තිබූ ආකාරය විමර්ශනයේ විශ්වාසනීයත්වය පිළිබඳ බරපතල සැකයක් ඇති කරන බව නීතිඥයෝ පැවසූහ.
නීතිඥ කුමාරවඩිවේල් ගුරුපරන් මහතා තර්ක කළේ, පොලිසිය දැනටමත් මෙම සිද්ධිය සම්බන්ධයෙන් නිගමනයකට එළඹ ඇති බවයි. මුල් අවස්ථාවේ ගොනු කළ ‘බී වාර්තා’ මගින් මෙම වෙඩි තැබීම ‘ආත්මාරක්ෂාව සඳහා’ සිදු කළ එකක් බව පොලිසිය සඳහන් කර තිබූ බව ඔහු පෙන්වා දුන්නේය.
“එවැනි නිගමනයකට දැනටමත් එළඹ ඇති පාර්ශවයකට, පසුව එම නිගමනය සනාථ කිරීමට සාක්ෂි සොයන අතරතුර අපක්ෂපාතී පරීක්ෂණයක් කළ හැකි යැයි විශ්වාස කිරීම අපහසුය.” – නීතිඥ කුමාරවඩිවේල් ගුරුපරන්
තවද, පෙබරවාරි 10 වැනි දින වාර්තාවකට අනුව වෙඩි තැබීමට යොදාගත් ගිනිඅවි සල්මන් සහ මාරසිංහ යන පොලිස් කොස්තාපල්වරුන්ට නිකුත් කළ ඒවා බව හඳුනාගෙන තිබුණද, ඔවුන් මෙතෙක් අත්අඩංගුවට ගෙන හෝ සැකකරුවන් ලෙස නම් කර නොමැති බවද අධිකරණයේදී අනාවරණය විය.
දෙපාර්ශවයේම තර්කවලට සවන් දීමෙන් අනතුරුව, මහේස්ත්රාත් නලිනි සුබාස්කරන් මහත්මිය සඳහන් කළේ පවතින විමර්ශනය පිළිබඳව වින්දිත පාර්ශවය දැඩි අතෘප්තියකින් පසුවන බවයි. යුක්තිය ඉටු කිරීම පමණක් නොව, සාධාරණ ක්රියාවලියක් අනුගමනය කරන බවට මහජනතාව තුළ විශ්වාසයක් ඇති කිරීම අධිකරණයේ වගකීම බව ඇය අවධාරණය කළාය.
ඒ අනුව, විමර්ශනය වහාම කොළඹ අපරාධ පරීක්ෂණ දෙපාර්තමේන්තුවට (CID) පවරන ලෙස ඇය පොලිස්පතිවරයාට නියෝග කළාය. නඩුව වැඩිදුර විභාගය සඳහා අප්රේල් 22 දක්වා කල් තබන ලදී.
අරුල්පියස්ගේ ඝාතනය දෙමළ ජනතාව අතර දැඩි කම්පනයක් ඇති කර ඇති අතර, වගකිවයුත්තන් අත්අඩංගුවට ගන්නා ලෙස බල කරමින් යාපනයේ විරෝධතා රැසක් පැවැත්විණි. මෙම සිදුවීමත් සමඟ උතුරු-නැගෙනහිර ප්රදේශවල ආරක්ෂක අංශ විසින් සීමාව ඉක්මවා බලය පාවිච්චි කිරීමත්, එවැනි සිදුවීම්වලින් පසු වසර ගණනාවක් තිස්සේ පවතින මුක්තිය (දඬුවම් නොලබා සිටීම) පිළිබඳව නැවතත් දැඩි කතිකාවතක් ගොඩනැගී ඇත.
