ප්‍රකාශයක් ලබා ගැනීමෙන් පසු හිටපු ඇමති රවී කරුණානායක අල්ලස් හෝ දූෂණ චෝදනා විමර්ශන කොමිෂන් සභාව අද (අගෝස්තු 31) අත්අඩංගුවට ගෙන ඇත.
අල්ලස් හෝ දූෂණ චෝදනා විමර්ශන කොමිසමේ දැනුම් දීමකට අනුව අද ඔහු එම කොමිසමට පැමිණ තිබූ අතර ඒ අනුමත බඳවා ගැනීමේ පටිපාටියෙන් බැහැරව පුද්ගලයින් පස් දෙනෙකු ජාතික ලොතරැයි මණ්ඩලයට කොන්ත්‍රාත් පදනම මත බඳවාගෙන ඔහුගේ පෞද්ගලික කාර්ය මණ්ඩලයට අනුයුක්ත කිරීමේ චෝදනාව සම්බන්ධයෙන් වන විමර්ශනයකට අදාළවය.
අල්ලස් හෝ දූෂණ චෝදනා විමර්ශන කොමිසම හමුවේ පෙනී සිටින ලෙස ඔහුට මීට පෙර අවස්ථා හතරකදී කැඳවීම් කර තිබුණද ඔහු එම කොමිසම හමුවේ පෙනී නොසිටීම හේතුවෙන් මීට දින දෙකකට පෙර එම කොමිසමේ නිලධාරින් පාර්ලිමේන්තුව අසල රජමල්වත්ත පාරේ පිහිටි ඔහුගේ නිවසට ගියද ඔහු නිවසින් බැහැරව ගොස් තිබුණි.
මේ අතර 2015-2016 කාලසීමාවේ සිදුවූ ශ්‍රී ලංකා මහ බැංකු බැඳුම්කර වංචාව සම්බන්ධයෙන්ද විමර්ශනය කළ ජනාධිපති පරීක්ෂණ කොමිෂන් සභාව හමුවේ කරුණු හෙළිවීමෙන් පසු, එවකට විදේශ කටයුතු අමාත්‍ය ධුරය දැරූ රවී කරුණානායක මහතාට 2017 අගෝස්තු මාසයේදී සිය අමාත්‍ය ධුරයෙන් ඉල්ලා අස්වීමට සිදුවිය.
බැඳුම්කර වංචාවට සම්බන්ධ ප්‍රධාන සැකකරුවෙකු වූ අර්ජුන් ඇලෝසියස්ගේ ‘වෝල්ට් ඇන්ඩ් රෝව්’ සමාගම මඟින් කොල්ලුපිටිය ‘මොනාක්’ නිවාස සංකීර්ණයේ සුඛෝපභෝගී පෙන්ට්හවුස් නිවසක් රවී කරුණානායක මහතාගේ පවුලේ සාමාජිකයන් වෙනුවෙන් කුලී පදනම මත ලබාදීම සහ පසුව එය මිලදී ගැනීම සම්බන්ධයෙන් අල්ලස් කොමිසම විසින් කොළඹ මහාධිකරණයේ වෙනම නඩුවක්ද ගොනු කර තිබුණී.
2016 මාර්තු මාසයේ පැවති බැඳුම්කර වෙන්දේසියකදී රුපියල් බිලියන ගණනක රජයේ මුදල් අවභාවිත කිරීමේ චෝදනාව මත නීතිපතිවරයාගේ උපදෙස් පරිදි 2021 මාර්තු මාසයේදී කොළඹ විශේෂ ත්‍රිපුද්ගල මහාධිකරණ විනිසුරු මඩුල්ලක් විසින් රවී කරුණානායක මහතා ඇතුළු සැකකරුවන් පිරිසක් රක්ෂිත බන්ධනාගාරගත කිරීමටද නියෝග කරන ලදී.
