පවතින මැදපෙරදිග කලාපීය නොසන්සුන්තාව සහ ඉන් එල්ල විය හැකි බලපෑම් පිළිබඳව අවධානය යොමු කරමින්, ශ්රී ලංකා ජනාධිපති අනුර කුමාර දිසානායක මහතා සහ කටාර් රාජ්යයේ එමීර් ෂෙයික් තමිම් බින් හමාඩ් අල්-තානි මහතා අතර විශේෂ දුරකථන සංවාදයක් පවත්වා තිබේ.
විදේශ මාධ්ය වාර්තා කරන අන්දමට, මෙම සාකච්ඡාවේ ප්රධාන අරමුණ වී ඇත්තේ කලාපයේ පවතින වත්මන් අර්බුදකාරී තත්ත්වය හමුවේ දෙරටේ සහයෝගීතාව තහවුරු කර ගැනීමයි.
මෙහිදී ජනාධිපති අනුර කුමාර දිසානායක මහතා ප්රකාශ කර ඇත්තේ කටාර් රාජ්යය මුහුණ දී සිටින අභියෝගාත්මක අවස්ථාවේදී ශ්රී ලංකාව සැමවිටම ඔවුන් සමඟ සහයෝගීතාවයෙන් පසුවන බවයි. දෙරට අතර පවතින දීර්ඝකාලීන මිත්රත්වය මෙම අර්බුද හමුවේ තවදුරටත් ශක්තිමත් වන බව ජනාධිපතිවරයා මෙහිදී අවධාරණය කර ඇත.
මෙම රාජ්යතාන්ත්රික සාකච්ඡාවේදී කටාර් එමීර්වරයා විසින් ශ්රී ලංකාවට අතිශය වැදගත් සහතික කිරීම් දෙකක් ලබා දී තිබේ. ප්රථමයෙන්, මැදපෙරදිග කලාපයේ පවතින නොසන්සුන් වාතාවරණය හමුවේ වුවද කටාර් රාජ්යය තුළ සේවය කරන සහ පදිංචිව සිටින ලක්ෂ සංඛ්යාත ශ්රී ලාංකික ශ්රමිකයන්ගේ මෙන්ම පදිංචිකරුවන්ගේ සුභසාධනය හා ආරක්ෂාව පිළිබඳව උපරිම අවධානය යොමු කරන බව ඔහු ජනාධිපතිවරයා වෙත අවධාරණය කර ඇත.
දෙවනුව, මෙරට ආර්ථික ස්ථාවරත්වයට තීරණාත්මක බලපෑමක් එල්ල කරන බලශක්ති අවශ්යතාව කෙරෙහි අවධානය යොමු කරමින්, ඕනෑම අභියෝගාත්මක තත්ත්වයක් යටතේ වුවද ශ්රී ලංකාවට අවශ්ය ඉන්ධන සැපයුම අඛණ්ඩව සහ ස්ථාවරව පවත්වාගෙන යාමට කටාර් රාජ්යය කැපවී සිටින බව එමීර්වරයා වැඩිදුරටත් සහතික කර තිබේ.
